Eignaumsjón | Eignaumsjon

Fyrirsjáanlegur skortur á heimtaugum

Jul 20, 2021 | Fréttir

Flest eldri fjöleignarhús eru ekki byggð með hleðslu rafbíla í huga og því þarf í mörgum tilfellum að leggja nýjar, eða stækka eldri heimtaugar ásamt því að setja upp álagsstýringarkerfi.

Í ár er stærstur hluti nýskráðra bifreiða knúinn áfram með rafmagni að öllu eða einhverju leyti. Af því leiðir að eigendahópur rafbíla verður stærri og hleðslustöðva er þörf í fleiri húsbyggingum, þ. á m. fjölbýlishúsum.

Með nýrri lagabreytingu um fjöleignarhús var ætlunin að liðka fyrir rafbílavæðingu í fjölbýlishúsum. Þannig geta rafbílaeigendur knúið húsfélagið til að gera kostnaðaráætlun varðandi uppbyggingu hleðslustöðva og ákveða í framhaldinu hvaða ráða eigi að grípa til. Slíkar framkvæmdir hlaupa oft á milljónum króna svo aðrir félagar í húsfélaginu kunna að telja sig hlunnfarna við að borga hluta í hleðslustöð nágranna sinna.

Hleðslustöð auki virði íbúða

Bjarni Gnýr Hjarðar, sérfræðingur hjá Eignaumsjón, segir hleðslustöð gulls ígildi fyrir íbúðaeigendur, hvort sem hún er sameiginleg eða einkastöð og segir þær auka virði íbúðanna á fasteignamarkaðinum. Fjárfestingin muni borga sig margfalt til baka enda hleðslustöð aðdráttarafl fyrir kaupendur.

Reykjavíkurborg og Orkuveitan gerðu með sér samkomulag í apríl 2019 um að styrkja húsfélög fjöleignarhúsa við uppsetningu hleðslustöðva. 40 milljónir króna renna árlega í sjóðinn og þegar hafa 49 húsfélög sótt um styrk og 31 fengið greitt. Í þessum 49 fjöleignarhúsum sem sótt hafa um eru alls 1.846 íbúðir.

Styrkja framkvæmdir í fjölbýlum

Styrktarfjárhæðin nemur að hámarki 1,5 milljónum króna og meðalkostnaður hvers verkefnis hljóðar upp á 2,5 milljónir króna að meðaltali með virðisaukaskatti. Hægt er að fá virðisaukaskattinn af hleðslustöðvunum sjálfum endurgreiddan.

Guðmundur B. Friðriksson, skrifstofustjóri á skrifstofu umhverfisgæða hjá Reykjavíkurborg, segir aðsóknina vera mikla miðað við það að sjóðurinn hafi hvergi verið auglýstur. 80% Reykvíkinga búi í fjölbýlishúsum og því sé um að ræða mikilvægt skref í orkuskiptunum. Guðmundur segir stóran hluta kostnaðar í mörgum framkvæmdum fela í sér stækkun eða lagningu nýrrar heimtaugar, sérstaklega í eldri húsum. Hann segir það geta reynst flöskuháls fyrir fjöleignarhúsin, bæði hvað varðar kostnað og mögulega bið eftir heimtaug í framtíðinni.

Stækkun lagna betri kostur

Jóhannes Þorleiksson, forstöðumaður rafveitna hjá Orkuveitu Reykjavíkur, telur betra að stækka núverandi lagnir í stað þess að fjárfesta í nýjum heimtaugum. Snjallar hleðslulausnir dragi verulega úr þörf á stækkun þar sem heimtaugin nýtist betur. Bjarni Gnýr er annarrar skoðunar: „Gömlu fjölbýlishúsin eru einfaldlega ekki hönnuð til þess að hlaða rafbíla. Það er nánast alltaf skynsamlegt að fá sér nýja heimtaug, þessar byggingar eru bara ekki með heimtaug til hleðslu rafbíla.“ Hann sér fram á heimtaugaskort á næstu árum ef rafbílavæðingin heldur áfram á sömu braut.

Jóhannes hjá OR hefur ekki áhyggjur af slíkum skorti: „Veitur fylgjast með afhendingartíma heimlagna og munu bregðast við ef hann verður óeðlilega langur. Oftast dugir að stækka heimtaugar og hleðslulausnir með álagsstýringu draga verulega úr þörf á stækkun heimtauga. Fjölmargir aðilar ofmeta gríðarlega hleðsluþörf vegna rafbíla.“

Vill varast offjárfestingu

Jóhannes er frekar á því að rafbílavæðingin muni leiða til offjárfestingar og hærri verðlagningar. „Stofnkerfi rafmagnsdreifikerfis er öflugt og ræður við talsverða álagsaukningu. Veitur telja að aukin rafbílavæðing og orkuskipti almennt muni leiða til lægri gjaldskráa ef innviðir eru nýttir vel og ekki offjárfest í þeim,“ segir Jóhannes.

Baldur S. Blöndal

baldurb@mbl.is

Umfjöllunin birtist í Viðskiptablaði Morgunblaðsins 14. júlí 2021.

Húsbók Eignaumsjónar mælist vel fyrir

Jul 9, 2021 | Fréttir, Greinar

Húsbók Eignaumsjónar, sem leysti af hólmi mínar síður viðskiptavina félagsins í nóvember í fyrra, hefur almennt mælst mjög vel fyrir. Í húsbókinni geta eigendur og stjórnir húsfélaga á einfaldan hátt nálgast upplýsingar um málefni síns húsfélags og fylgst rafrænt með greiðslustöðu og fleiru hjá húsfélaginu þegar hentar.

Innskráning í Húsbókina er aðgangsstýrð í gegnum www.island.is með rafrænum skilríkjum í snjallsíma eða íslykli, til að tryggja að einungis þeir sem eiga rétt á að skoða umrædd gögn hafi aðgang að þeim. Allt kapp var lagt á að hafa notendaviðmót húsbókarinnar sem fljótvirkast og þægilegast og stöðugt er verið að huga að úrbótum til að mæta sem best þörfum viðskiptavina Eignaumsjónar.

Nýjungar í Húsbókinni

Notendur, sem ávallt eru skráðir inn í Húsbókina með kennitölu greiðanda og/eða eiganda, geta nú skráð allt að þrjú mismunandi netföng í húsbókinni. Þetta getur t.d. verið hentugt fyrir bæði fyrirtæki og fjölskyldur með eignir í fleiri en einu húsfélagi í þjónustu hjá Eignaumsjón. Notendur sem vilja nýta sér þessa nýjung í Húsbókinni ganga frá netfangabreytingum með því að smella á „Notendastillingar“, uppi hægra megin í Húsbókinni.

Önnur nýjung í Húsbókinni tengist boðun funda. Í aðdraganda hús- og aðalfunda eru t.d. öll fundargögn aðgengileg í húsbókinni, til upplýsingar og skoðunar fyrir eigendur. Undir flipanum „Næsti fundur“ birtast nú bæði fundarboð hús- og aðalfunda, sem og öll gögn sem búið er að skrá í Húsbók viðkomandi húsfélags fyrir fundinn.

Helstu gögn viðkomandi húsfélags á einum stað

Í Húsbókinni er leitast við að safna saman og gera aðgengileg öll helstu gögn viðkomandi húsfélags og því má segja að þar verði jafnóðum til drög að ástandssögu húseignarinnar í gegnum framkvæmdir sem ráðist er í á vegum húsfélagsins og fundargerðir sem þar liggja að baki o.fl. Húsbókin er því upplýsingaveita um ástand eignar, t.d. við kaup eða sölu, jafnframt því að vera upplýsingagátt til eigenda og stjórna húsfélaga í þjónustu hjá Eignaumsjón.

Eigendur/íbúar hafa alltaf aðgang að nýjustu upplýsingum um húsgjöldin sín, s.s. greiðsluseðla og kröfusögu. Í Húsbókinni er enn fremur hægt að nálgast fundargerðir, ársreikninga, kostnaðaráætlanir, tryggingarskírteini og ýmis gögn sem snúa að viðhaldi og framkvæmdum viðkomandi húsfélags.

Gagnsemi Húsbókarinnar er ekki síðri fyrir stjórnir húsfélaga. Þar er m.a. hægt á hverjum tíma að sjá daglega fjárhagsstöðu húsfélagsins, stöðu bankareikninga, útistandandi húsgjöld/framkvæmdagjöld og stöðu innheimtukrafna allra greiðenda. Í Húsbókinni eru einnig eftirlitsskýrslur húsumsjónar aðgengilegar, ef við á, sem og önnur gögn sem snúa að stjórn húsfélagsins.

Hvenær á að byrja að undirbúa viðhaldsframkvæmdir?

Jul 8, 2021 | Fréttir

Öll fjölbýli þurfa rafhleðslustöðvar innan 10 ára

Jun 29, 2021 | Fréttir

„Samkvæmt spá sem við höfum gert út frá opinberum gögnum gerum við ráð fyrir að eftir 10 ár verði um 50% fólksbíla hér á landi knúin raforku að einhverju eða öllu leyti. Það gera þá um 150.000 bílar en þeir voru aðeins um 15.000 um síðustu áramót. Þessir bílar dreifast víða og verða í hverju einasta fjölbýlishúsi þannig að innan áratugar þurfa öll fjölbýli að vera búin að koma upp rafhleðslustöðvum. Langflestir kaupendur fasteigna gera orðið kröfu um að slíkar tengingar séu til staðar, ekki í óráðinni framtíð heldur strax í dag.“

Hlutlaus og fagleg úttekt

Þetta segir Bjarni G. Hjarðar, byggingar- og umhverfisverkfræðingur en hann er sérfræðingur og ráðgjafi á fasteignasviði Eignaumsjónar. Hann leiðir þróun nýjunga í þjónustu Eignaumsjónar, m.a. úttektir á hleðslufyrirkomulagi rafbíla í fjölbýlishúsum. „Við bjóðum upp á hlutlausa og faglega úttekt ásamt ráðgjöf um bestu framtíðarlausnir varðandi uppsetningu stöðvanna. Að mörgu þarf að huga í upphafi s.s. að tryggja að heimtaug í hús sé nægjanlega öflug, hvaða búnaður skuli valinn, hver sé tæknileg geta hans og að álagsstýringarbúnaður sé til staðar svo fáein dæmi séu nefnd.“

Bjarni segir að útfærsla á hleðslu rafbíla í fjölbýlishúsum hafi oft verið einfalt viðfangsefni meðan fáir rafbílar voru í umferð og unnt var að leysa málin þannig að dugði um hríð. Eftir að stjórnvöld breyttu fjöleignarhúsalögum í maí 2020, sem skyldaði húsfélög til að bregðast við óskum um að koma upp rafhleðslustöðvum, sé hins vegar ljóst að huga þurfi betur að heildarfyrirkomulagi þessara mála með áherslu á framtíðarlausnir og réttláta skiptingu kostnaðar milli húsfélaga og einstakra notenda.

Þrenns konar Bílastuð

Bílastuð er ný þjónustuleið Eignaumsjónar vegna hleðslu rafbíla. Í Bílastuði 0 er gerð úttekt á hleðsluaðstöðu húsfélagsins og gerð kostnaðar- og framkvæmdaáætlun. Í Bílastuði 1 færir Eignaumsjón innheimtu gjalda vegna hleðslu rafbíla frá ábyrgð húsfélagsins yfir í sjálfvirkt fyrirkomulag og reikningagerð.

„Þá er þriðja leiðin það sem við köllum Bílastuð 1+1 en þá ábyrgist Eignaumsjón rekstur og viðhald kerfanna ef þau eru að fullu snjallvædd en það tryggir nákvæma skrá um notendur og notkun hvers fyrir sig sem auðvitað er forsenda fyrir sanngjarnri og réttri innheimtu. Okkar sýn er að sem flest húsfélög líti til opinna lausna, þ.e. að engu skipti við val á kerfi hver framleiðandi hleðslustöðva er eða hvaða aðili selur notandanum raforkuna.

Jarðefnaeldsneytisbílar bannaðir

Við spyrjum Bjarna að lokum út í áform stjórnvalda um að hætta innflutningi árið 2030 á fólksbifreiðum sem ganga fyrir jarðefnaeldsneyti.

„Já, stefnan liggur fyrir og er hún í samræmi við það sem önnur ríki í Evrópu hafa ákveðið. Þá má og nefna að allir helstu bílaframleiðendur heims hafa þegar ákveðið að hætta notkun olíu eða bensíns sem orkugjafa í sína nýju bíla eftir aðeins nokkra mánuði og misseri. Nú er meðalaldur fólksbíla um 12,5 ár og það gefur auga leið að þú færð ekki hátt endursöluverð fyrir bílinn þinn ef hann er knúinn bensíni eða olíu þegar þessi staða er komin upp. Því velja langflestir rafbíla eða tengiltvinnbíla í dag. Fólk mun ekki eiga val um þetta heldur stendur það frammi fyrir orkuskiptum bílaflotans innan örfárra ára – orkuskipta sem svo sannarlega eru tímabær af umhverfislegum ástæðum.“

Viðtal við Bjarna G. Hjarðar, sérfræðing á fasteingasviði Eignumsjónar í Sóknarfæri í júní 2021.

Upplýsingakerfi Eignaumsjónar fær góða dóma í úttekt Grant Thornton

Jun 29, 2021 | Fréttir

Sérhannað upplýsingakerfi sem heldur utan um allan kostnað fyrir yfir 700 hús- og rekstrarfélög sem eru í þjónustu hjá Eignaumsjón, fær góða dóma í nýrri úttekt Grant Thornton endurskoðunar á upplýsingatæknimálum og innra eftirliti félagsins.

Kerfið, sem heitir Miðgarður og er sérhannað fyrir Eignaumsjón, heldur í raun utan um allar fjárreiður og kostnað viðkomandi húsfélaga, þ.m.t. greiðslur reikninga og innheimtu húsgjalda. Auk þess hefur verið skrifað inn í upplýsingakerfið öflugt verkbókhald sem heldur utanum alla þjónustu við húsfélög, fundarhöld og ráðgjöf. Þá hafa einnig verið hugmyndir um að bæta fjárhagsbókhaldskerfi við Miðgarð, svo hægt verði að fullvinna þar fjárhagsuppgjör.

Uppfyllir reglur um rafrænt bókhald og vel hugað að öryggismálum

Það er mat Grant Thornton að mikil hagræðing fælist í því að Eignaumsjón gæti reitt sig eingöngu á Miðgarð sem bókhaldskerfi og þyrfti þá ekki að lesa allar fjármálafærslur yfir í sérstakt fjárhagsbókhaldskerfi eins og nú er gert. Grant Thornton skoðaði sérstaklega hvort Miðgarður uppfylli kröfur reglugerðar nr. 505/2013 um rafrænt bókhald, sem er forsenda fyrir því að kerfið geti orðið fullgilt bókhaldskerfi.

„Almennt er það okkar niðurstaða að þróun kerfisins og reksturinn á því sé til fyrirmyndar og hugað er vel að öryggismálum í hvívetna. Ekki er hægt að sjá að úrbóta sé þörf á kerfinu eins og það er rekið í dag og er það mat okkar að það uppfyllir framangreinda reglugerð,“ segir m.a. í bréfi Grant Thornton endurskoðunar til Eignaumsjónar. Jafnframt kemur þar fram að bæta þurfi úr svokallaðri skjölunarkröfu reglugerðarinnar og úrbóta sé einnig þörf á vettvangi persónuverndar, enda safni félagið nokkuð af persónugreinanlegum upplýsingum í sinni starfsemi.

Ánægjulegar niðurstöður

„Það er mjög ánægjulegt að fá þessa jákvæðu niðurstöðu um upplýsingakerfið okkar frá Grant Thornton, virtu fyrirtæki á sínu sviði sem er að þjóna mörgum af stærstu fyrirtækjum landsins og er jafnframt eitt af stærstu endurskoðunarfyrirtækjum heims,“ segir Daníel Árnason, framkvæmdastjóri Eignaumsjónar.

„Til að tryggja enn betri þjónustu, hraða og gagnsæja upplýsingagjöf höfum við lagt æ meiri áherslu á tækniuppbyggingu innan fyrirtækisins. Þar er Miðgarður í lykilhlutverki við að auka skilvirkni og gæði þjónustunnar. En það er jafnframt ljóst af þessum niðurstöðum að alltaf má gera betur og verður nú hafist handa við úrbætur á þeim þáttum sem betur mega fara hjá okkur.“

Um úttektina

Úttektin byggir á leiðbeiningum frá Grant Thornton Int. Einnig voru hafðar til hliðsjónar leiðbeinandi tilmæli Fjármálaeftirlitsins, kröfur ISO staðals um upplýsingaöryggi og hvað telst til bestu framkvæmdar við skoðun á upplýsingatækniumhverfi.

Fyrirsjáanlegur skortur á heimtaugum

Húsbók Eignaumsjónar mælist vel fyrir

Hvenær á að byrja að undirbúa viðhaldsframkvæmdir?

Öll fjölbýli þurfa rafhleðslustöðvar innan 10 ára

Upplýsingakerfi Eignaumsjónar fær góða dóma í úttekt Grant Thornton

Recent Posts