Eignaumsjón | Eignaumsjon

Rafrænir hús- og aðalfundir orðnir löglegir

Jun 24, 2021 | Fréttir

Breytingar á fjöleignarhúsalögunum sem heimila eigendum fjöleignarhúsa að halda rafræna húsfundi og nota rafræn skjöl og tölvupósta í samskiptum milli stjórnar og félagsmanna voru samþykktar sem lög frá Alþingi þann 10. júní sl., á lokametrum þinghaldsins og hafa lagabreytingarnar þegar öðlast gildi.

Með breytingunum er verið að laga tiltekin ákvæði laganna að tækniframförum í rafrænum samskiptum og stöðunnar sem upp kom vegna heimsfaraldurs kórónuveirunnar, m.a. á eigendur fjöleignarhúsa vegna hús og aðalfunda og samskipta milli félagsmanna innan húsfélaga.

Lögum samkvæmt skal aðalfundum húsfélaga vera lokið fyrir apríllok ár hvert en grípa þurfti til þess í tvígang að fresta aðalfundum um ákveðinn tíma. Var þá bent á að ef heimilt væri samkvæmt lögum um fjöleignarhús að halda rafræna húsfundi og halda uppi rafrænum samskiptum, væri hægt að leysa þessi vandamál.

Skapar meira svigrúm og val

Markmið lagabreytingarinnar er að veita eigendum fjöleignarhúsa meira svigrúm og val um hvort húsfundir verði alfarið haldnir rafrænt eða að hluta til og hvort samskipti milli félagsmanna og stjórnar verði rafræn. Að sama skapi er líka leitast við að gera slíkt fyrirkomulag löglegt með því að kveða á um það í lögunum að slíkt form húsfunda sé jafngilt því að mæta í eigin persónu. Sjá nár hér.

Eignaumsjón fagnar þessari lagabreytingu sem mun auðvelda til muna að halda bæði hús- og aðalfundi húsfélaga á tilskildum tíma, s.s. við aðstæður eins og þær sem ríkt hafa í COVID-19 faraldrinum. Hafa þegar verið gerðar ráðstafanir til að bjóða upp á þessa tegund fundaþjónustu og fundasalir félagsins á Suðurlandsbraut 30 útbúnir með fjarfundabúnaði.

Rafhleðslustöðvar hafi jákvæð áhrif á fasteignaverð

Jun 21, 2021 | Fréttir

Uppsetning rafhleðslustöðva í fjölbýlishúsum hækkar fasteignaverð, að mati Bjarna Gnýs Hjarðar, sérfræðings á byggingasviði hjá Eignaumsjón.

„Gott rafhleðslukerfi eykur virði fasteigna og er kostur en ekki vandræði. Því fyrr sem það er gert því betra. Þetta er tækifæri til að gera húsið verðmætara og auðseljanlegra,“ segir Bjarni.

Hann segir að gríðarlegur fjöldifyrirspurna hafa borist Eignaumsjón vegna ráðgjafar til fjölbýlshúsa um uppsetningu hleðslustöðva. „Við erum að sjá verulega aukningu í fyrirspurnum. Í apríl voru ein til tvær fyrirspurnir á viku en nú eru þær ein til tvær á dag. Húsfélagi hvers húss ber skylda samkvæmt lögum til að hafa framkvæmdaáætlun sem snýr að uppbyggingu kerfis til hleðslu rafbíla,“ segir Bjarni og vísar í nýleg lög sem segja til um það að ef einn íbúi fjölbýlis óskar eftir aðstöðu fyrir rafhleðslustöð þurfi húsfélagið að búa til framkvæmdaáætlun og síðan koma upp aðstöðu fyrir rafhleðslustöð ekki seinna en tveimur árum eftir gerð framkvæmdaráætlunar.

„Ef þetta er húsfélaginu ofviða er hægt að fresta framkvæmdinni í allt að tvö ár en það á ekki við nema í undantekningartilfellum.“

Bjarna finnst sérstakt að þótt þessi lög séu til staðar, þá sé aðstaða fyrir rafhleðslustöð ekki tekin inn í fasteignamat. „Þetta er svolítið sérstakt. Þetta er komið inn í lög en ekki fasteignamatið. Það er algjörlega augljóst að þetta eykur verðmæti á markaði. Kaupendur hafa áhuga á þessu og fasteignasalar munu tilgreina þetta sem kost.“

Ómögulegt til lengri tíma

Bjarni segir að í meira en helmingi tilfella sé nauðsynlegt fyrir fjölbýli að uppfæra heimtaug. „Í yfir helmingi tilfella er viðeigandi að ná sér í nýja heimtaug sem fyrst því það er ekki rafmagn aflögu en það getur líka verið hagkvæmara. Við höfum dæmi um að það geti verið hagkvæmara að fá nýja heimtaug en að deila út rafmagni frá eldri heimtaugum, þó það sé nóg rafmagn. Það er kannski hægt að fæða eitthvað af rafbílum með eldri heimtaug en til lengri tíma er það ómögulegt því heimtaugarnar duga oft ekki til þegar yfir helmingur af bílaeigninni er rafbílar.“

Bjarni segir að kostnaður við uppsetningu á nýrri heimtaug fari mjög eftir aðstæðum en þó að öll pappírsvinnan sé tiltölulega ódýr er það framkvæmdin sem er dýrari. Bjarni bætir við að það að skipta um heimtaug sé sameiginlegt verkefni allra íbúa fjölbýlis og segir það nánast alltaf hagkvæmt að koma upp aðstöðu fyrir hleðslustöðvar þó að ekki eigi allir íbúar rafmagnsbíl eða tengiltvinnbíl.

Flóðbylgja á leiðinni

„Þú leggur kannski út 100 þúsund krónur og færð varla minna en milljón til baka sem fasteignaeigandi, alveg sama hvort þú átt rafmagnsbíl eða ekki.“

Bjarni telur líklegt að eftir þrjú ár verði öll fjölbýli á höfuðborgarsvæðinu komin með aðstöðu fyrir uppsetningu rafhleðslustöðva. „Þannig að það er flóðbylgja á leiðinni.“

Viðtal Morgunblaðsins 19. júní 2021við Bjarna G. Hjarðar, sérfræðing á fasteignasviði Eignaumsjónar.

Fólkið okkar – Díana Íris

Jun 9, 2021 | Fréttir

Díana Íris Guðmundsdóttir hefur starfað í rúm tvö ár í þjónustuveri Eignaumsjónar og sinnir erindum frá stjórnum hús- og rekstrarfélaga sem eru í þjónustu hjá Eignaumsjón og eigendum einstakra íbúða og eigna.

„Eignaumsjón er stækkandi fyrirtæki með einkunnarorðin gott viðmót, þekking og skilvirkni og ég get staðfest að nákvæmlega þannig vinnum við,“ segir Díana en hún er ein af sjö starfsmönnum þjónustuversins sem annast öll almenn erindi sem berast á hverjum degi, ýmist í tölvupósti, netspjalli, símtölum eða heimsóknum á skrifstofu félagsins að Suðurlandsbraut 30 í Reykjavík.

Frábær vinnustaður með yndislegu starfsfólki

„Eignaumsjón er frábær vinnustaður með yndislegu starfsfólki og það eru forréttindi að fá að mæta þar til vinnu á hverjum degi. Ég þarf að takast á við bæði fjölbreytt og mjög ólík verkefni, sem er það skemmtilega við starfið því maður lærir alltaf eitthvað nýtt á hverjum degi.“

Díana er „Kópavogsmær í húð og hár, eins og hún orðar það. Hún gekk í Smáraskóla og síðan MK og Fjölbraut í Garðabæ og lauk BA í félagsráðgjöf frá HÍ árið 2013, með millilendingu í Englandi í eitt ár þar sem hún vann sem aupair en tók líka samhliða nokkra áfanga í fjarnámi í HÍ.

„Áður en ég kom til Eignaumsjónar í janúar 2019 starfaði ég sem flugfreyja hjá WOW air og bæði sú reynsla og námið í háskólanum nýtist vel í starfi mínu við að þjónusta húsfélög með ýmis verkefni sem tengjast starfsemi þeirra.“

Lífið utan vinnu er fjölskyldan

„Líf mitt utan vinnu er fjölskyldan. Við reynum að gera eitthvað skemmtilegt og uppbyggilegt um helgar. Bestu helgarnar eru þegar við förum í sumarbústað, annað hvort til foreldra minna eða tengdaforeldra og getum verið í sveitasælunni þar sem börnin geta leikið sér úti og við erum í rólegheitum að safna orku fyrir næstu vinnuviku,“ segir Díana sem á tvö börn með sambýlismanni sínum, 2ja og 5 ára og 11 ára stjúpson. Þau búa auðvitað í Kópavogi, í Kórahverfinu.

Aðspurð hvað eigi að gera í sumarfríinu segist hún ætla í frí í júlí, þegar börnin eru í sumarfríi og planið sé að gera eitthvað skemmtilegt saman og njóta samverunnar, bæði hér heima á fótboltamótum og fleiru. Jafnvel verður farið til útlanda ef aðstæður leyfa.

„Ég var í fæðingarorlofi í fyrra en í sumarfríinu fórum við hringinn í kringum landið með börnin okkar og heimsóttum marga staði sem við höfðum aldrei komið á. Við fórum líka á fótboltamót hjá elsta stráknum okkar í Vestmannaeyjum og á Akureyri og vorum líka mikið uppi í sumarbústað. Sumarið í fyrra var dásamlegt og vonandi verður það eins þetta árið!“