Aug 30, 2024 | Fréttir
Innskráningu í Húsbók á vef Eignaumsjónar hefur verið breytt yfir í Signet – Advania þar sem innskráningarþjónusta island.is, sem notast hefur verið við til þessa, verður lokuð öðrum en opinberum aðilum frá 1. september nk.
Í innskráningarþónustu Signet – Advania er áfram í boði að skrá sig inn með rafrænum skilríkjum, s.s. snjallsíma, sem og auðkennisappi og fleiri leiðum. Íslykillinn dettur hins vegar út þar sem hann virkar eingöngu hjá island.is.
Umboð í stað íslykils
Í stað íslykils er nú í boði að veita umboð, sem bæði fyrirtæki og einstaklingar geta þá nýtt sér. Undir hnappnum „UM OKKUR“ á heimasíðu Eignaumsjónar er að finna undirsíðu – Umboð fyrir Húsbókina – þar sem er hlekkur til að veita umboð, sem og nákvæmar leiðbeiningar um hvernig það er gert.
Þannig geta eigendur/greiðendur veitt öðrum umboð til að sýsla með sín málefni í Húsbókinni og í tilfelli fyrirtækja/lögaðila geta prókúruhafar sömuleiðis fyllt þar út umboð sem heimilar þá umboðshafa að fara með málefni viðkomandi lögaðila í Húsbókinni.
Þjónustuverið aðstoðar ef þörf er á
Ef einhver vandkvæði koma upp við innskráningu minnum við á að hægt er að leita aðstoðar hjá þjónustuverinu okkar í netspjalli eða senda tölvupóst á thjonusta@eignaumsjon.is, eða hringja í síma 585-4800.
Aug 16, 2024 | Fréttir
Flutningar á skrifstofu- og fundaraðstöðu Eignaumsjónar standa nú fyrir dyrum af jarðhæðinni á Suðurlandsbraut 30 upp á 2. hæð hússins. Standsetning húsnæðisins er vel á veg komin og áætlað að flytja fljótlega í september.
„Það má segja að stöðugur vöxtur félagsins undanfarin misseri, nú síðast kaupin á starfsemi Fjöleigna fyrr í sumar, hafi endanlega sprengt utan af okkur húsnæðið á jarðhæðinni,“ segir Daníel Árnason, framkvæmdastjóri Eignaumsjónar og því hafi verið tímabært að færa starfsemina um set.
Bætt aðstaða fyrir viðskiptavini og starfsfólk
Húsnæðið á 2. hæð verður sniðið að starfsemi Eignaumsjónar með þægindi starfsfólks og viðskiptavina í huga. Má þar sértaklega nefna vel útbúna fundaraðstöðu í bakhúsinu. Þar verða fimm fundarsalir fyrir aðalfundi húsfélaga; þrír salir fyrir allt að 25 gesti og tveir fyrir allt að 60 gesti, sem hægt verður að breyta í 120 gesta sal sem hentar þá fyrir fundi stórra húsfélaga.
„Við viljum bæta fundaraðstöðuna hjá okkur því við finnum að það mælist vel fyrir hjá okkar viðskiptavinum að hafa aðgang að slíkri aðstöðu. Aðgengi, bæði að skrifstofu og fundarsölum verður líka eins og best verður á kosið. Hér er einnig gott framboð af bílastæðum og almenningssamgöngur eru góðar með stoppistöð framan við húsið,“ segir Daníel.
„Við hlökkum til að taka á móti viðskiptavinum okkar í nýju og glæsilegu húsnæði innan tíðar. Við erum líka spennt að sjá hverjir verða nágrannar okkar á jarðhæðinni, þar sem við höfum unað okkur vel síðustu níu árin.“
Jun 28, 2024 | Fréttir
Starfsfólk og skrifstofa Fjöleigna flytur í dag frá Tryggvagötu 11 að Suðurlandsbraut 30, þar sem sameinuð skrifstofa Fjöleigna og Eignaumsjónar tekur til starfa á mánudaginn, 1. júlí 2024.
„Það er ánægjulegt að fá þau Ingibjörgu Önnu, Halldór, Birgi Þór, Guðríði, Lindu og Róbert til starfa með okkur á mánudaginn og við bjóðum þau hjartanlega velkomin,“ segir Daníel Árnason, framkvæmdastjóri Eignaumsjónar.
Gengur vonandi hratt og vel fyrir sig
„Við hlökkum til að koma inn í starfsumhverfi Eignaumsjónar og sinna eftir sem áður okkar húsfélögum hjá Fjöleignum, sem og öðrum spennandi verkefnum,“ segir Ingibjörg Anna Björnsdóttir. „Það er von okkar að þessi sameining á starfsemi Fjöleigna og Eignaumsjónar gangi hratt og vel fyrir sig og verði öllum til hagsbóta.“
Fyrst í stað verður hægt að hringja áfram í símanúmer Fjöleigna, 531-6000 og senda tölvupóst í netfangið fjoleignir@fjoleignir.is, en unnið er að því að koma öllum gögnum og upplýsingum frá Fjöleignum inn í verkumsjónarkerfi og vinnuferla Eignaumsjónar, þ. á m. inn í Húsbókina, mínar síður eigenda.
Jun 27, 2024 | Fréttir
Sigurborg Sólveig Guðmundsdóttir hefur verið ráðin aðalbókari hjá Eignaumsjón og hefur hún þegar tekið til starfa hjá félaginu.
Sigurborg er viðskiptafræðingur að mennt, með Cand. Oecon próf frá Háskóla Íslands með áherslu á reikningsskil og endurskoðun. Hún hefur einnig lokið námi sem leikskólakennari frá Fósturskóla Íslands og er með stúdentspróf af hagfræðibraut frá Verzlunarskóla Íslands. Sigurborg var fjármálastjóri hjá Hreinsitækni ehf. í fimm ár, áður en hún kom til starfa hjá Eignaumsjón. Þar áður starfaði hún m.a. á Endurskoðunarsviði Deloitte í níu ár, fyrst og fremst við gerð og endurskoðun ársreikninga fyrirtækja.
Sem aðalbókari ber Sigurborg ábyrgð á gæðum bókhalds og framkvæmd rekstraruppgjöra, ásamt gerð og yfirferð ársreikninga viðskiptavina Eignaumsjónar. Hún ber enn fremur ábyrgð á skipulagningu og vinnu teyma á fjármálasviði, annast eftirfylgni með árangri og útgáfu reikninga fyrir Eignaumsjón. Aðalbókari tekur einnig þátt í þróun upplýsingakerfa fyrirtækisins og verkferla og er m.a. í mikilvægu hlutverki við þróun og innleiðingu á nýju bókhalds- og uppgjörskerfi Eignaumsjónar.
Um Eignaumsjón
Eignaumsjón býr að 23 ára þekkingu og reynslu í þjónustu við húsfélög og rekstrarfélög atvinnuhúsnæðis. Félagið þjónar um 900 hús- og rekstrarfélögum með yfir 20.000 íbúðum/eignum og starfsmenn eru 42 talsins. Áhersla er lögð á hlutlausa nálgun, öryggi, gæðamál og skýra verkferla með það að markmiði að gera rekstur fasteigna markvissari og ódýrari, auka upplýsingaflæði til eigenda og auðvelda störf stjórna.
Jun 26, 2024 | Fréttir
Samkomulag hefur náðst um að Eignaumsjón hf. kaupi Fjöleignir ehf., húsfélagaþjónustu KRST lögmanna ehf. og taki við allri þjónustu við viðskiptavini í samræmi við gildandi þjónustusamninga.
Eignaumsjón tekur formlega við rekstri Fjöleigna í byrjun júlí 2024. Starfsfólk Fjöleigna kemur þá til starfa á skrifstofu Eignaumsjónar að Suðurlandsbraut 30, sem tryggir að hús- og rekstrarfélög frá Fjöleignum njóta eftir sem áður þjónustu starfsfólks sem þekkir vel til mála.
Aukin þörf fyrir sérhæfðari þjónustu
„Það fellur ekki að kjarnastarfsemi KRST lögmanna að eiga og reka húsfélagaþjónustu. Miklar breytingar eru að eiga sér stað á þessum markaði og rekstur fjöleignarhúsa alltaf að verða flóknari og umfangsmeiri. Aukin þörf er fyrir sérhæfingu sem stærri þjónustuaðili á betra með að veita. Það er góð lausn að okkar mati að Eignaumsjón, sem er öflugur aðili á þessum markaði, taki við keflinu til að tryggja að vel verði hugsað um viðskiptavini Fjöleigna og hagsmuni þeirra,“ segir Jón Bjarni Kristjánsson, framkvæmdastjóri KRST lögmanna.
Góð þjónusta og skilvirkar tæknilausnir
„Við hlökkum til að takast á við þessa áskorun og fögnum nýju starfsfólki sem kemur til liðs við okkur. Eignaumsjón hefur verið leiðandi í þjónustu við húsfélög og rekstrarfélög fjöleignarhúsa, allt frá því að félagið tók til starfa árið 2000. Við ætlum okkur að þróa áfram þá þjónustu til að mæta enn betur sívaxandi þörfum eigenda fasteigna með öruggri og góðri þjónustu,“ segir Daníel Árnason, framkvæmdastjóri Eignaumsjónar.