Í stað þess að senda viðskiptavinum Eignaumsjónar jólakort nú fyrir jólin hefur félagið ákveðið að styrkja jólaaðstoð fyrir hátíðarnar.
Verkefnið „Gefðu poka“ hjá Mæðrastyrksnefnd varð fyrir valinu og gekk framkvæmdastjóri Eignaumsjónar í dag frá netgreiðslu til Mæðrastyrksnefndar sem jafngildir 33 matarpokum, jafnmörgum og starfsmenn Eignaumsjónar eru.
Meðfylgjandi er slóð á verkefnið ef fleiri vilja leggja því lið: https://maedrastyrkur.is/
Það sem bar hæst rekstrarlega á líðandi ári hjá okkur er án efa að framkvæmd aðalfunda komst á ný í fastar skorður, eftir tvö erfið COVID-19 ár, en við hjá Eignaumsjón erum að vinna fyrir um 800 húsfélög og rekstrarfélög atvinnuhúsa, með hátt í 18.000 íbúðum/fasteignum. Blessunarlega tókst okkur að ljúka langflestum aðalfundum á fyrstu fjórum mánuðum ársins, eins og lög mæla fyrir um, enda hafa ákvarðanir aðalfunda mikla þýðingu fyrir daglegan rekstur fjölbýlihúsa , sagði Daníel Árnason framkvæmdastjóri í desemberútgáfu blaðsins Sóknarfæris, þar sem spurt var hvað borið hefði hæst á árinu í starfsemi Eignaumsjónar.
Það er líka ánægjulegt að húsfélögum sem eru í þjónustu hjá okkur hefur fjölgað jafnt og þétt á árinu, bæði í eldri fjöleignarhúsum og nýbyggingum. Nýju fjölbýlishúsin eru almennt stærri og tæknilega flóknari í rekstri og hafa því kallað á aðeins aðra nálgun í þjónustu okkar. Þau eru búin allskyns tæknibúnaði og sérhæfðum þáttum, s.s. hita-, öryggis- og aðgangsstýringum sem þarf að sinna, til viðbótar við hefðbundna fjármála-, funda- og rekstrarþjónustu. Það er mikilvægt að okkar mati að ná strax í byrjun utan um þessi stóru samfélög með skipulögðum og formföstum hætti til að ná utan um alla þætti sem skipta máli varðandi starfsemi húsfélagsins og rekstur sameignarinnar, lögum samkvæmt.
Hleðslumál rafbíla í fjölbýlishúsum hafa verið ofarlega á baugi í starfsemi Eignaumsjónar á líðandi ári. Þar höfum við stigið inn og bjóðum húsfélögum upp á hlutlausa úttekt á framtíðarfyrirkomulagi sem uppfyllir lagalegar skyldur húsfélaga. Við aðstoðum líka stjórnir húsfélaga við að útvega tilboð í hleðslukerfi og berum saman tilboð með hagsmuni húsfélaga að leiðarljósi. Þessi þjónusta hefur skilað umtalsverðum sparnaði til húsfélaga sem hafa nýtt sér hana. Einnig bjóðum við húsfélögum upp á greiðsluþjónustu fyrir innheimtu gjalda vegna hleðslu rafbíla.
Breytingar sem eru fram undan á sorphirðumálum á Íslandi með gildistöku nýrra laga um hringrásarhagkerfi um áramótin hafa einnig verið okkur hugleiknar hjá Eignaumsjón. Á nýju ári hefst söfnun á lífrænum eldhúsúrgangi á höfuðborgarsvæðinu, sem kallar á breytingar. Til að varpa ljósi á framtíðarfyrirkomulag sorphirðumála stóðum við fyrir hádegisfundi fyrir stjórnir húsfélaga í þjónustu hjá okkur í byrjun nóvember þar sem fulltrúar Samtaka sveitarfélaga á höfuðborgarsvæðinu, SORPU og Reykjavíkurborgar höfðu framsögu og svöruðu spurningum. Mæting var framar björtustu vonum og áhuginn mikill, eins og fjölmiðlaumræða að undanförnu hefur glögglega sýnt. Það blasir við að sorphirðumálin verða áfram í brennidepli á næsta ári og þar ætlum við okkur að leggja okkar viðskiptavinum lið og sama gildir um rafhleðslumál í fjölbýlishúsum.
Almennt höldum við jafnframt áfram að þróa og efla þjónustu okkar við fasteignaeigendur á komandi ári, eins og við höfum gert í þau bráðum 23 ár sem eru liðin frá því við hófum að ryðja brautina fyrir rekstrarumsjón fyrir húsfélög og atvinnuhúsnæði á Íslandi. Fjölbýlishúsum hérlendis mun halda áfram að fjölga og þau verða sífellt stærri og flóknari sem kallar á enn markvissari og betri þjónustu og til að ná utan um starfsemi og rekstur þessara stóru samfélaga.
Aðventan er undirbúningstími aðalfunda hjá Eignaumsjón og á dögunum kom starfsfólk Eignaumsjónar og fundastjórateymið saman til skrafs og ráðagerða. Fyrstu aðalfundir hefjast 9. janúar næstkomandi en alls er áætlað að halda vel á sjöunda hundrað aðaldundi fyrstu fjóra mánuði ársins 2023, en lögum samkvæmt skal halda aðalfundi hús- og rekstrarfélaga fyrir lok aprílmánaðar ár hvert.
Samkvæmt fyrirliggjandi áætlun verða haldnir um 620 fundir á 60 fundardögum fram til aprílloka, sem eru að meðaltali um tíu fundir á dag. Að öllu jöfnu verða aðalfundirnir haldnir frá mánudegi til fimmtudags í fundarsölum Eignaumsjónar að Suðurlandsbraut 30. Þar eru í boði fimm góðir fundarsalir án endurgjalds. Salirnir sem um ræðir eru Múli sem tekur 7-9 manns, Dalur og Reykjaborg sem taka allt að 40 manns hvor og Laugarás og Grensás sem hvor um sig tekur allt að 50 manns. Í þeim tilvikum þegar fundir eru haldnir utan skrifstofu Eignaumsjónar er notast við ýmsa fundarsali, í samráði við stjórnir viðkomandi húsfélaga.
Rétt boðun funda mikilvæg
Mikið er lagt upp úr að rétt sé staðið að boðun aðalfunda, svo tryggt sé að fundir og ákvarðanir verði lögmætar og bindandi fyrir eigendur. Boðun fundanna fer fram með eins góðum fyrirvara og hægt er, samkvæmt ramma fjöleignarhúsalaganna, og í samráði við stjórnir viðkomandi húsfélaga.
Allir eigendur, sem hafa skráð sig með tölvupósti í Húsbók húsfélagsins, fá sent rafrænt fundarboð/tölvupóst. Hvetjum við alla sem hafa ekki nú þegar virkjað Húsbókina sína til að gera það á heimasíðu Eignaumsjónar, www.eignaumsjon.is. Fundarboð eru send í bréfpósti á þá eigendur sem eru með skráð lögheimili utan viðkomandi húseignar og formenn húsfélaga hengja einnig upp fundarboð í sameign.
Gögn aðalfundar aðgengileg á Húsbók
Húsbókin er rafræn upplýsingagátt fyrir stjórnir og eigendur í húsfélögum í þjónustu hjá Eignaumsjón og þar er m.a. hægt að skoða húsgjaldaseðla, fundargerðir og fleiri upplýsingar sem tengjast húsfélaginu.
Tímanlega fyrir aðalfund 2023 geta íbúðaeigendur nálgast fundargögn síns húsfélags í Húsbókinni. Þar verður líka hægt að skoða ársreikning fyrir árið 2022, kostnaðar- og húsgjaldaáætlun fyrir árið 2023, aðalfundarboðið og fleiri gögn tengd starfsemi húsfélagsins.
Til að komast inn í Húsbókina þarf að smella á hnapp efst til hægri á heimasíðunni og skrá kennitölu viðkomandi. Í Húsbókinni er líka m.a. hægt að óska eftir að fá fundaboð send rafrænt, sjá notendastillingar og skoða vildarkjör/afslætti sem bjóðast öllum viðskiptavinum Eignaumsjónar.
Aðalfundur oft eini vettvangur skoðanaskipta
Aðalfundirnir hafa mikla þýðingu í starfsemi hvers húsfélags. Þar skal tryggja að mál sem brenna á eigendum séu tekin fyrir og til lykta leidd, enda er aðalfundur oft eini vettvangur skoðanaskipta hjá sumum félögum og því er mikilvægt að þar fái allar raddir að njóta sín.
Eignaumsjón er í hópi leiðandi íslenskra fyrirtækja sem hafa uppfyllt ströng skilyrði HR Monitor til að vera útnefnd Mannauðshugsandi fyrirtæki árið 2022.
„Þetta er ánægjuleg viðurkenning fyrir okkar 30 manna fyrirtæki og hvatning til að halda áfarm og gera enn betur,“ segir Daníel Árnason, framkvæmdastjóri Eignaumsjónar, um viðurkenningu HM Monitor.
Mánaðarlegar mælingar
Til að ná þessum árangri hefur Eignaumsjón keyrt mánaðarlegar mannauðsmælingar meðal allra starfsmanna fyrirtækisins á líðandi ári og hefur starfsfólkið verið upplýstir reglulega um niðurstöður mannauðsmælinganna og árangur fyrirtækisins.
Með þessu verklagi er sýnt í verki að mannauður skiptir fyrirtækið miklu máli og jafnframt hafa stjórnendur Eignaumsjónar öðlast innsýn í viðhorf starfsfólks til fyrirtækisins, bæði í heildina og innan sviða, deilda og vinnuteyma.
Reykjavíkurborg ætlar að hefja innleiðingu breyttrar sorphirðu í maí á næsta ári og á henni að vera lokið í október. Nú standa yfir útboð hjá Reykjavíkurborg og öðrum sveitarfélögum á höfuðborgarsvæðinu vegna fyrirhugaðra tunnuskipta og annarra breytinga sem fara þarf í til að mæta ákvæðum nýrra laga um hringrásarhagkerfi, sem Alþingi samþykkti árið 2021 og taka þau gildi nú um áramótin.
Lögin kveða m.a. á um að skylt verði að safna við heimili lífrænum eldhúsúrgangi, til viðbótar við söfnun á plasti, pappír/pappa og almennu sorpi. Samhliða gildistöku laganna verður líka öll flokkun úrgangs á höfuðborgarsvæðinu samræmd.
Á kynningarfundi fyrir formenn og stjórnir húsfélaga, sem Eignaumsjón stóð fyrir í liðinni viku með fulltrúum frá Samtökum sveitarfélaga á höfuðborgarsvæðinu, SORPU og Reykjavíkurborg, kom fram að innleiðingin í Reykjavík muni fara fram samkvæmt ákveðinni forskrift um fjölda íláta sem þarf við hvert hús miðað við fjölda íbúa. Tunnuskiptin byrja í maí á næsta ári þegar verktakar á vegum borgarinnar byrja að fara í hvern borgarhluta á fætur öðrum til að skipta út ílátum og endurnýja úr sér gengin ílát ef þarf. Borgarhlutarnir eru níu talsins og er gert er ráð fyrir að tunnuskiptin taki að jafnaði þrjár vikur í hverjum borgarhluta og þeim að vera lokið í október.
Sorplosun á tveggja vikna fresti
Strax að loknum tunnuskiptum í hverjum borgarhluta tekur nýja sorphirðukerfið gildi með vikulegri losun. Aðra vikuna verður hirt almennt sorp og lífrænn úrgangur en hina vikuna pappír/pappi og plast.
Nýju tunnunum fylgja jafnframt þar til gerðar körfur til að hafa innanhúss undir bréfpoka fyrir lífrænan úrgang. Bréfpokunum verður svo safnað í lífrænu tunnuna. Fram kom á kynningarfundinum að fyrst um sinn verði bréfpokarnir afhentir íbúum ókeypis.
Allmörg húsfélög í Reykjavík hafa komið sér upp djúpgámum og kom fram á fundinum að lítið mál yrði að aðlaga djúpgámana að nýja flokkunarkerfinu. Frá upphafi hafi verið gerð krafa um fimm flokkunarlínur fyrir djúpgáma í borginni og því þurfi einungis að breyta merkingum á þeim , til samræmis við nýjar flokkunarkröfur.
Sorpgeymslan og sporrennan
Margir hafa áhyggjur af takmörkuðu rými í sorpgeymslum með tilkomu lífrænu tunnunnar en bent var á það á fundinum að aukin flokkun og skil á grenndarstöðvar ætti að draga úr þörf fyrir almennar sorptunnur. Jafnframt verður boðið upp á fleiri stærðir á gráum tunnum fyrir almennt sorp. Þar á meðal er nýtt 370 lítra ílát, sem er tæplega þriðjungi stærra en venjuleg grá tunna sem tekur 240 lítra og töluvert minna um sig en stóru 660 lítra sorpkerin.
Á fundinum kom líka fram að það sé á valdi húsfélaga þar sem er sorprenna að ákveða hvort henni verði lokað eða hún notuð áfram. Ef sorprennan verði áfram í notkun fari best á því að vera með gráa tunnu fyrir almennt sorp undir rennunni, ekki lífrænu tunnuna.
Almennt er horft til þess hjá Reykjavíkurborg að íbúar og húsfélög þurfi að gera sem minnst vegna innleiðingar nýja sorphirðukerfisins. Voru stjórnir húsfélaga hvattar til þess að láta reyna á nýja kerfið áður en farið væri að huga að breytingum. Þar sem ekki yrði komist hjá því að breyta sorpgeymslum eða koma upp nýrri aðstöðu þyrfti byggingarleyfi og voru þeir sem teldu vera þörf á breytingum hvattir til að hafa samband við borgina á netfanginu sorphirda@reykjavik.is.
Gjaldskrá hvetji til sorpflokkunar
Loks skal nefnt að fram kom á fundinum að gjaldskrá vegna sorphirðu verði notuð sem „hvati til að auka sorpflokkun“. Gjöldin muni lækka hjá þeim sem eru duglegir að flokka en gjöld vegna óflokkaðs sorps – „sóðatunnunnar“ – muni hækka en ekki liggur enn fyrir hve mikil hækkun verður.