#Yfir 20 ára þekking og reynnsla

Tæknisviði Eignaumsjónar vex fiskur um hrygg

Apr 29, 2024 | Fréttir

Nýlega var gengið frá ráðningu tveggja nýrra sérfræðinga til Eignaumsjónar og starfa nú fjórir tölvunarfræðingar hjá tæknisviði félagsins, sem komið var á laggirnar í fyrra í tengslum við skiplagsbreytingar. Með þessum ráðningum er verið að efla enn frekar tæknigetu fyrirtækisins í öryggismálum og rafrænum tæknilausnum. Tæknisviðinu er ætlað að leiða stafræna vegferð Eignaumsjónar, sem hefur það að markmiði að gera bæði starfsfólki og viðskiptavinum kleift að vinna rafrænt með öll gögn sem tengjast þjónustu og rekstri fyrirtækisins.

Sigurður Gauti Hauksson, sem hefur unnið lengi að tölvu- og tæknimálum fyrir Eignaumsjón, hefur nú verið ráðinn sviðsstjóri tæknisviðs Eignaumsjónar. Með honum kemur líka til starfa Snæbjörn Halldór Snæbjörnsson, sem mun sinna hugbúnaðarþróun. Aðrir starfsmenn tæknisviðsins eru Emil Hilmarsson, öryggis- og upplýsingatæknistjóri og Sævar Þór Sigfússon, sem annast bæði hugbúnaðargerð og tækniþjónustu.

Úr pappír í starfrænt umhverfi

„Eignaumsjón hefur unnið markvisst að því í allmörg ár að færa starfsemi sína yfir í starfrænt umhverfi,“ segir sviðsstjóri tæknisviðsins, Sigurður Gauti Hauksson. Hann bendir á að þörfin sé brýn þar sem félagið er með yfir 900 hús- og rekstrarfélög í þjónustu, með um 20 þúsund fasteignum/einingum.

„Það gefur auga leið að mikið hagræði er að geta sent yfir 20 þúsund kröfur út rafrænt í hverjum mánuði ásamt um sjöþúsund gjaldareikningum í stað þess að senda þetta allt út á pappír, með tilheyrandi prent- og sendingarkostnaði.“

Öryggi gagna, rekstur og þróun netkerfa

Efling tæknisviðs Eignaumsjónar er rökrétt skref á þeirri braut sem fyrirtækið hefur verið að feta í rekstri upplýsingakerfa sinna. Meginverkefni tæknisviðsins er annars vegar að tryggja öryggi allra gagna og hins vegar að þróa áfram netkerfi fyrirtækisins og sjá til þess að rekstur þeirra gangi snurðulaust fyrir sig.

„Svo til öll starfsemi okkar byggist orðið á tölvutækni og stefnan til framtíðar er að vinna allt rafrænt,“ segir Sigurður Gauti. Hann nefnir rafræna fundi, rafrænar undirskriftir og rafrænt greiðsluuppgjör sem dæmi um áhugaverða áfanga sem Eignaumsjón hefur náð á undanförnum misserum og árum , að ógleymdri Húsbókinni, sem tekin var í gagnið árið 2020 á 20 ára afmælisári fyrirtækisins.

„Í upphafi var töluvert mikið lagt í Húsbókina, sem er rafræn upplýsingagátt fyrir viðskiptavini, en við erum stöðugt að vinna að uppfærslum og viðbótum til að bæta enn frekar upplifun viðskiptavina okkar,“ segir sviðsstjóri tæknisviðsins og klikkir út með að næsta stóra skrefið þar sé að tryggja alrafræna afhendingu allra gagna yfir í Húsbókina.

Húseigendatrygging húsfélaga

Apr 26, 2024 | Fréttir, Greinar

Eignaumsjón mælir með að eigendur fasteigna í fjölbýlishúsum taki sameiginlega húseigendatryggingu fyrir sameign húsfélagsins, frekar en að hver og einn eigandi sé með slíka tryggingu. Meðal kosta við þetta fyrirkomulag er að áhætta vegna vatnstjóns fellur á einn tryggingartaka, ekki marga og eigendur lenda síður í innbyrðis ágreiningi vegna tjóna í sameign því tryggingin er á höndum eins tryggingafélags.

Húseigendatryggingar kom oftar en ekki til umræðu á aðalfundum og ber þá stundum á því að eigendur fasteigna rugli húseigendatryggingu saman við brunatryggingu eða innbústryggingu. Mikilvægt er að draga skýra línu þar á milli og að tryggt sé að fasteignaeigendur geri sér fulla grein fyrir hvort fasteign viðkomandi er tryggð eða ekki.

Ákvörðun á hús- eða aðalfundi

Á löglega boðuðum hús- og aðalfundum húsfélaga er hægt að taka ákvarðanir um sameiginlega húseigendatryggingu eigenda, oftast kölluð húseigendatrygging eða fasteignatrygging. Ef samþykkt er að taka slíka tryggingu á löglega höldnum húsfundi, skuldbindur það eigendur til þátttöku, en þó eru dæmi þess að í samráði við tryggingafélag sé hægt að draga einstakar eignir tengdir atvinnurekstri út úr sameiginlegri húseigendatryggingu.

Eignaumsjón gætir hagsmuna eigenda varðandi iðgjöld húseigendatrygginga, sem og ef upp koma tjón sem fylgja þarf eftir af hálfu húsfélags. Mikilvægt er að eigendur tilkynni tjón eins fljótt og unnt er til tryggingafélags síns húsfélags, svo hægt sé að bregðast hratt við. Oft þarf líka að staðreyna ýmis atriði, s.s. vindhraða eða úrkomumagn, til að fá úr því skorið hvort tjón fáist bætt eða ekki.

Húseigenda- eða fasteignatryggingar bæta í meginatriðum eftirfarandi:

Eignatrygging bætir eignatjón á húseigninni sjálfri, t.d. vegna vatns, innbrots, óveðurs o.fl.
Ábyrgðatrygging bætir skaðabótaskyldu sem falla kann á tryggingartaka, samkvæmt íslenskum lögum og réttarvenjum, sem eiganda húseignar eða húshluta.
Málskostnaðartrygging/réttargæslutrygging tryggir eigendur sem verða fyrir málshöfðun eða þurfa að sækja rétt sinn með aðstoð lögmanns.

Rétt er að geta að húseigendatryggingar bæta ekki tjón vegna utanaðkomandi vatns, svo sem grunnvatns, úrkomu, flóða, sjávarfalla eða vatns frá svölum, þökum, þakrennum eða frárennslisleiðslum þeirra. Algengast er að það reyni á bætur varðandi tjón af völdum vatns úr leiðslum í sameign eða sameiginlegum leiðslum húseignar, í hlutfalli við eignarhluta vátryggðs í húseigninni.

Hægt er að finna skilmála húseigendatrygginga á heimasíðum tryggingafélaganna.

Ánægjulegt að taka þátt í að móta farsælt samfélag í Hamranesinu

Apr 12, 2024 | Fréttir

Rífandi gangur er í uppbyggingu fjölbýlishúsa í Hamranesi, nýjasta hverfinu í Hafnarfirði, sem rís hratt syðst í bænum, sunnan Skarðshlíðarhverfis og Vallahverfis. Gert er ráð fyrir alls um 1.900 íbúðum í hverfinu fullbyggðu og nú þegar eru yfir 1.600 íbúðir ýmist tilbúnar eða á byggingarstigi.

Allar lóðir í Hamraneshverfinu hafa þegar verið seldar en lóðaframkvæmdir hófust í ársbyrjun 2021. Áætlaður íbúafjöldi í hverfinu fullbyggðu er um 4.750 manns, miðað við þann stuðul að íbúar í hverri eign séu 2,5. Fyrstu íbúarnir eru þegar fluttir inn í fjölmörg húsanna og hefur sala íbúða gengið betur síðustu mánuðina en margir höfðu þorað að vona, þökk sé hlutdeildarlánum sem eru í boði fyrir ungt fólk og fyrstu kaupendur á fasteignamarkaði.

815 íbúðir í 28 húsum

Ný fjölbýlishús kalla lögum samkvæmt á stofnun húsfélaga og þar hefur Eignaumsjón mætt sterk til leiks í Hamraneshverfinu, því félagið er þegar búið að stofna 12 húsfélög fyrir 28 hús á svæðinu þar sem eru samtals 815 íbúðir, eða nærri helmingur þeirra íbúða sem eru ýmist tilbúnar eða á byggingarstigi í Hamraneshverfinu.

„Það er ánægjulegt að fylgjast með þessari glæsilegu og hröðu uppbyggingu í Hamranesinu og taka þátt í stofnun þessara nýju húsfélaga þar og leggja þannig lið, bæði lóðarhöfum og íbúðareigendum, við að móta farsælt samfélag á byggingarreitnum,“ segir Páll Þór Ármann, sem er yfir sölu- og samskiptum hjá Eignaumsjón og hefur til fjölda ára annast stofnun og innleiðingu nýrra húsfélaga hjá Eignaumsjón.

Brú milli byggingaraðila og kaupenda

Undanfarin ár hefur stofnun húsfélaga í sívaxandi mæli verið að frumkvæði byggingaraðila þegar sala íbúða er hafin og íbúar að fara að flytja inn. „Við höfum leyft okkur að kalla þessa þjónustu okkar „brú“ á milli byggingaraðila/seljenda annars vegar og kaupenda nýrra eigna hins vegar og er allra hagur,“ segir Páll. „Byggingaraðilar spara sér bæði fyrirhöfn og tíma sem færi annars í rekstur og daglega umhirðu sameignar nýbyggingarinnar og íbúðareigendur flytja inn í hús þar sem er búið að „ramma inn“ rekstur sameignarinnar og starfsemi húsfélagsins með samþykktum og húsreglum.“

Deildaskipt heildarhúsfélög

Í nýjum og stærri fjölbýlishúsum lætur Eignaumsjón alla jafnan deildaskipt heildarhúsfélag halda utan um fasteignir, sem samkvæmt skilgreiningu fjöleignarhúsalaganna mynda saman eitt húsfélag.

„Þannig getur t.d. sameiginlegt ytra byrði, lóð og/eða bílageymsla tengt saman fleiri hús eða fasteignir í eitt húsfélag. Til dæmis eru þessi 12 húsfélög sem við erum búin að stofna í Hamraneshverfinu mjög mismunandi að stærð, eða allt frá 12 íbúða húsfélagi í einu húsi upp í 157 íbúða húsfélag í sjö húsum/stigagöngum,“ segir Páll og áréttar að almennt skili það hagræði fyrir eigendur að láta eitt deildaskipt heildarfélag halda utan um allt sem snýr að rekstri sameignar húsfélagsins. Jafnframt er tryggt að öll starfsemi sem tengist húsfélaginu sé römmuð inn með skýrum samþykktum og uppgjörsreglum, bæði fyrir félagið í heild sem og milli deilda/stigaganga.

„Heildarfélag tryggir betra jafnvægi í rekstri til lengri tíma, tryggir samræmt utanumhald og auðveldar hagræðingu, bæði í innheimtu, öflun þjónustu o.fl. Stjórnun húsfélagsins verður líka styrkari með eina stjórn, sem skipuð er fulltrúum úr öllum deildum húsfélagsins, í stað þess að mörg félög og margar stjórnir komi að málum,“ segir Páll að lokum.

Greinin var birt í 4. tbl. Fjarðarfrétta, 11. apríl 2024 og er einnig aðgengileg hér.

Aðgangsstýringar og öryggismál – ný sérþjónusta fyrir húsfélög

Mar 26, 2024 | Fréttir

Eignavöktun er ný þjónustuleið hjá Eignaumsjón fyrir húsfélög sem eru að koma upp aðgangsstýringu og öryggiskerfum í fjöleignarhúsum. Eignaumsjón tekur einnig að sér rekstur og umsjón slíkra kerfa fyrir húsfélög.

Mikil aukning hefur verið í uppsetningu öryggiskerfa í fjölbýlishúsum og bílageymslum á undanförnum árum og töluvert um að húsfélög hafi leitað til Eignaumsjónar um aðstoð við umsjón og rekstur slíkra kerfa.

Eftir greiningu á þeim vandamálum sem þessi húsfélög hafa verið að glíma við er það mat sérfræðinga okkar að þroskaður markaður sé til staðar hérlendis í sölu búnaðar en ekki í rekstri og umsýslu þessara kerfa,“ segir Gunnþór S. Jónsson, forstöðumaður þjónustusviðs Eignaumsjónar.

Úttekt og eftirlit með uppsetningu

„Til að ná fram skilvirkari og hagkvæmari lausnum í öryggismálum og tryggja betri yfirsýn, verkeftirlit og kostnaðargát, bjóðum við nú húsfélögum upp á þríþætta þjónustuleið sem við köllum Eignavöktun til að tryggja ábyrgan rekstur og faglega umsjón með öryggiskerfum húsfélaga,“ segir Gunnþór. Fyrsta skrefið í þjónustunni er fagleg og hlutlaus úttekt á öryggismálum viðkomandi fjölbýlishúss og eða bílageymslu í samráði við stjórn húsfélagsins.

„Sérfræðingur okkar skoðar fasteignina og útbýr skýrslu með tillögu að miðlægu aðgangsstýringar- og/eða öryggiskerfi, byggt á áhættugreiningu viðkomandi fasteignar. Tillaga að verk- og kostnaðaráætlun fylgir með skýrslu til stjórnar og við sjáum einnig um öflun tilboða frá búnaðarsölum, greinum þau og berum saman og skilum minnisblaði til stjórnar fyrir ákvarðanatöku með hag húsfélagsins að leiðarljósi,“ segir Gunnþór. Næsta skref í þjónustunni er eftirlit fyrir hönd húsfélaga með uppsetningu aðgangsstýringar og/eða öryggiskerfa í viðkomandi fjölbýlishúsum og/eða bílageymslum. Þannig er tryggt að uppsetning kerfis sé gerð í samræmi við samþykkt tilboð, með tilliti til efnis, vinnu og virkni kerfisins og prófanir gerðar á virkni. Fylgst er með framvindu verks og skilamat sent stjórn til undirbúnings og samþykktar húsfélags á reikningum.

Rekstur kerfis og umsjón

Til að stjórnir húsfélaga hafa góða yfirsýn yfir rekstrarkostnað öryggiskerfa þarf stýring og umsjón að vera trygg og ábyrg. „Við tökum að okkur rekstur, umsjón og umsýslu slíkra kerfa í umboði hússtjórna í fjölbýlishúsum,“ segir Gunnþór og bætir við að sá hluti þjónustunnar feli í sér eftirlit með stöðu og virkni kerfa í rauntíma. „Íbúar og notendur hafa aðgang að þjónustuveri okkar á skrifstofutíma og varðveisla gagna er tryggð, sem og rétt skráning rétthafa. Við innheimtum fyrir þjónustuna með húsgjöldunum, sem lækkar kostnað og innheimtu- og greiðslufyrirkomulagið er sanngjarnt: Sá greiðir sem notar!“

Húsumsjón – reglubundið eftirlit með sameign húsfélaga og atvinnuhúsa